ເປັນຫຍັງໃຊ້ເນັດມືຖື ແບັດໝົດໄວກວ່າໃຊ້ Wi-Fi?
ຂຽນໂດຍ: ປິຕິ ພັນທະສົມບັດ
ມື້ນີ້ e-Corner ເຮົາຈະມາໄຂຂໍ້ຄາໃຈວ່າ ເປັນຫຍັງເຮົາໃຊ້ເນັດຜ່ານ Wi-Fi ແບັດໂທລະສັບຄືບໍ່ຄ່ອຍຫຼຸດ ແຕ່ບາດຕໍ່ 3G/4G ເທົ່ານັ້ນລະ ແບັດເຕີຣີຫຼຸດລົງຢ່າງໄວ, ນອກນັ້ນບາງເທື່ອເຮົາໃຊ້ Wi-Fi ແບັດກໍຫຼຸດໜ້ອຍ ບາງເທື່ອກໍຜັດຫຼຸດໄວກວ່າປົກກະຕິ. ເອົ້າ! ທ່ານໃດສົນໃຈຮູ້ຄວາມຈິງກໍອ່ານຕໍ່ໄດ້ເລີຍ.
ກ່ອນອື່ນເຮົາຕ້ອງຮູ້ກ່ອນວ່າພະລັງງານແບັດເຕີຣີທີ່ນຳໃຊ້ໄປເວລາເຮົາໃຊ້ Wi-Fi ຫຼື ເນັດມືຖື ນັ້ນແມ່ນຖືກນຳໃຊ້ໄປເພື່ອການຮັບສົ່ງຂໍ້ມູນຜ່ານທາງສັນຍານຄື້ນຄວາມຖີ່, ສະນັ້ນແລ້ວຄວາມແຮງໃນການສົ່ງ ແລະ ຮັບສັນຍານຈຶ່ງເປັນໂຕຕ່ອນທີ່ກິນພະລັງງານແບັດເຕີຣີຂອງເຮົາ. ການທີ່ສ່ວນໃຫຍ່ແລ້ວການນຳໃຊ້ Wi-Fi ຈະໃຊ້ແບັດເຕີຣີໜ້ອຍກວ່າກໍຍ້ອນວ່າ ໂທລະສັບບໍ່ຈຳເປັນຕ້ອງສົ່ງສັນຍານອອກໄປໄກຄືກັບການໃຊ້ເນັດມືຖື ເພາະໜ່ວຍ router ຂອງເຮົານັ້ນຢູ່ໃກ້ໆ ຫຼື ໄກບໍ່ເກີນ 20 ແມັດ, ກົງກັນຂ້າມກັບການໃຊ້ເນັດມືຖືທີ່ໂທລະສັບຕ້ອງສົ່ງສັນຍານອອກໄປໄກຈົນຮອດເສົາຮັບສົ່ງສັນຍານທີ່ຢູ່ໃກ້ທີ່ສຸດ ຍິ່ງໂທລະສັບສົ່ງສັນຍານໄປໄກເທົ່າໃດ ກໍຍິ່ງໃຊ້ພະລັງງານຫຼາຍຂຶ້ນເທົ່ານັ້ນ.
ໂດຍມີບາງແຫຼ່ງຂໍ້ມູນອ້າງວ່າ ຖ້າເຮົາໃຊ້ເນັດມືຖື ຢູ່ໃກ້ໆກັບເສົາສັນຍານມັນຈະເຮັດໃຫ້ກິນແບັດໜ້ອຍລົງ ແລະ ທຽບເທົ່າກັບໃຊ້ Wi-Fi ໄດ້.
ແລະນັ້ນເອງກໍຄືສາເຫດທີ່ເປັນຫຍັງການໃຊ້ອິນເຕີເນັດຜ່ານ Wi-Fi ຈຶ່ງປະຢັດແບັດກວ່າ, ຍ້ອນເຫດນີ້ເອງການໃຊ້ເຄືອຂ່າຍ Wi-Fi ຍີ່ສັນຍານຕ່ຳ ກໍເປັນສາເຫດເຮັດໃຫ້ແບັດໝົດໄດ້ໄວ ກວ່າການໃຊ້ເຄືອຂ່າຍທີ່ມີສັນຍານທີ່ດີ (ເອີເວົ້າແບບນີ້ແລ້ວ ສິມີໃຜໄປຢືນໃຊ້ແປະ router ຕະຫຼອດບໍ່ນິ?)
ຂອບໃຈຂໍ້ມູນຈາກ: Ecorner
No comments:
Post a Comment